Di dieu loba kanyere Kanyere parentil keneh ............................................. ..............................................

Sisindiran nyaeta salahsahiji rupa puisi anu aya dina sastra Sunda. Aya tilu rupa sisindiran, nyaeta rarakitan, paparikan jeung wawangsalan. Umpama ditilik tina eusi atawa maksuda, aya sisindiran anu eusina mangrupa piwuruk, aya sisindiran anu eusina mangrupa silihasih, jeung aya oge sisindiran anu eusina mangrupa sesebred atawa heureuy. Di handap ieu conto dua pada sisindiran anu kekecapannana ampir sarua jeung sarupa:

Di dieu loba kanyere
Kanyere parentil keneh
Di dieu loba awewe
awewe carentil keneh

Didieu loba kanyere
Hanjakal parentil keneh
Didieu loba awewe
Hanjakal carentil kabeh

Rarakitan jeung paparikan miboga wanda kekecapan anu ampir sarua. Anu ngabedakeun rarakitan jeung paparikan nyaeta yen dina rarakitan mah aya hiji atawa dua kecap dina padalisan kahiji jeung padalisan kadua anu diulang deui dina padalisan katilu jeung padalisan kaopat. Sedengkeun dina paparikan mah teu aya ulangan saperti dina rarakitan.

Umpama nilik kana sisindiran di luhur, eta dua-duana sarua mangrupakeun sisindiran wangun rarakitan, sabab dina dua pada sisindiran di luhur teh aya hiji atawa dua kecap dina padalisan kahiji jeung padalisan kadua anu diulang deui dina padalisan katilu jeung padalisan kaopat.

Dina sapada rarakitan jeung paparikan aya opat padalisan. Sedengkeun dina sapada wawangsalan ngan saukur aya dua padalisan. Dina unggal padalisan sisindiran biasana aya dalapan engang atawa suku kata. Dina sisindiran aya bagean anu disebut "cangkang" jeung aya bagean anu disebut "eusi".

Dina rarakitan jeung paparikan, padalisan kahiji jeung padalisan kadua mangrupakeun cangkang, padalisan katilu jeung padalisan kaopat mangrupakeun eusi. Sedengkeun dina wawangsalan padalisan kahiji mangrupakeun cangkang jeung padalisan kadua mangrupakeun eusi.